AKTIVITET TRAJNUES: “Paragjykimet dhe Njëanshmëria Njohëse në Procesin Gjyqësor”

Shkolla e Magjistraturës, më datat 10-11 dhjetor 2024, në bashkëpunim me EIPA, Institutin Evropian të Administratës Publike, në mbështetje të Programit të Asistencës Teknike të Luksemburgut për Shqipërinë, zhvillon aktivitetin trajnues me temë: “Paragjykimet dhe Njëanshmëria Njohëse në Procesin Gjyqësor”, pranë ambienteve të Shkollës së Magjistraturës, në Tiranë.

Ky aktivitet drejtohet nga: 

Ekspertë:       Juan Diego Ramírez-Cárdenas Díaz, Lektor i lartë, EIPA Luxembourg 

Frank Lavadoux, Lektor i lartë, EIPA Maastricht

Prof. Sokol Berberi- Profesor për Programin e Formimit Fillestar në Shkollën e Magjistraturës

Qëllimi i këtij trajnimi është: Të rrisë ndërgjegjësimin e pjesëmarrësve për konceptet e paragjykimeve dhe njëanshmërisë së pavetëdijshme, ndikimin e tyre në perceptimet dhe sjelljet, dhe të sigurojë mjete për identifikimin dhe zbutjen e tyre. Në fund të modulit do të fokusohemi në manifestimin e këtyre dukurive në kontekstin specifik të vendimmarrjes gjyqësore. Kjo qasje do t'i shërbejë një qëllimi të dyfishtë: së pari, të nënvizojë se si këto ndikime mund të rrezikojnë paanshmërinë e vendimeve gjyqësore dhe së dyti, të eksplorojë teknika efektive për zbulimin dhe minimizimin e paragjykimeve gjatë shqyrtimit të çështjeve ligjore. Ky reflektim përfundimtar synon t'i pajisë pjesëmarrësit me mjete praktike për të forcuar objektivitetin në praktikën e tyre profesionale.

Trajnimi do të jetë ndërveprues duke alternuar të dhëna teorike, ushtrime praktike, raste studimore, lojë me role dhe diskutime në grup, si dhe do të përdoren mjete mbështetëse të ndryshme ( si video, pyetësorë, etj.) për të promovuar të mësuarit nga përvoja.

Gjatë këtij aktiviteti trajnues do të trajtohen tema të ndryshme, si: 

• Përkufizime dhe dallime ndërmjet paragjykimeve dhe paragjykimeve të pavetëdijshme; Origjina njohëse dhe sociale e paragjykimeve.
• Paraqitja e llojeve kryesore të paragjykimeve (stereotipe, paragjykime konfirmimi, etj.); Ndikimi i paragjykimeve në vendimmarrje dhe në marrëdhëniet ndërpersonale.
• Hyrje në konceptin e inteligjencës emocionale; Testi Implicit Association (IAT) për të zbuluar paragjykimet e dikujt.
• Strategjitë për identifikimin dhe reduktimin e paragjykimeve për të parandaluar ndikimin e tyre në vendimmarrjen gjyqësore/prokurorie.

Në këtë aktivitet trajnues marrin pjesë kandidatë për magjistratë të Republikës së Shqipërisë.